विद्यालयबाटै बालबालिका लैजाने क्रम बढ्दो
November 19, 2006आँखामा पट्टी बाँधेरसमेत लगियो
काठमाडौं, मंसिर २ - माओवादीले फकाउँदा नमान्नेलाई आँखामा पट्टी बाँधेरसमेत छापामारमा भर्ती गर्न लगेका छन् । विद्यालयबाटै बालबालिकालाई नियन्त्रणमा लिई लैजाने क्रम बढेको छ । अभिभावकहरू छोराछोरी फिर्ता ल्याउन पहल गरिदिन अधिकारकर्मी र सञ्चारकर्मीसँग आग्रह गर्न थालेका छन् । अभिभावकहरूको विरोधपछि रौतहटमा माओवादीले २४ बालबालिकालाई फिर्ता
गरेका छन् ।
अर्घाखाँचीमा माओवादीले भर्ती हुन जान नमान्नेलाई अपहरण शैलीमा आँखामा पट्टी बाँधेरसमेत लगेका हुन् । प्रत्यक्षदर्शीका अुनसार पट्टी बाँधिएकालाई ट्रकमा राखेर पाल्पाको देवीनगरस्थित शिविरतर्फ लगिएको छ । लगिएकामा बालबालिका र किशोरकिशोरी छन् । ‘त्यसरी लगिएकाहरू रुँदै गएका छन्,’ प्रत्यक्षदर्शीले कान्तिपुरसँग भने- ‘बलपूर्वक हतियार देखाएर लगे ।’ फकाउँदा पनि जान नमान्नेलाई उनीहरूले आँखामा पट्टी बाँधेका थिए । उनीहरूलाई सदरमुकाम ल्याएर बुटवल हुँदै पाल्पा लगेका थिए । लगिएकामा करिब ३ सय ७० बालबालिका र २ सय ४० किशोरकिशोरी छन् । उनीहरू १२ देखि २० वर्षका छन् । सदरमुकाम सन्धिखर्क, किमडाँडा, डिभर्ना, पाली, अडगुरी, बल्कोट, केरुंगा, खनदह गाविसबाट माओवादीले भर्तीका लागि लगेका छन् । स्कुले विद्यार्थीमा जनज्योति उच्चमावि कक्षा १० का वसन्त राना, ९ का उमा विक र विजय मावि डिभर्नाका देवीबहादुर थापालगायत छन् । अभिभावकलाई जानकारी नै नदिई उनीहरूलाई स्कुलबाट सोझै लगिएको थियो । आक्रोशित अभिभावकहरू सदरमुकाम आएका छन् । उनीहरूले मानव अधिकारवादी र सञ्चारकर्मीलाई छोराछोरी रिहाइका लागि पहल गरिदिन आग्रह गरेका छन् ।
‘जनसेना नपुगेका कारण नयाँ भर्ना गर्नुपरेको हो,’ माओवादी जिल्ला इञ्चार्ज कुशलको भनाइ उद्धृत गर्दै स्थानीयवासीले भने ।
उता धादिङमा एकसाता यता ४८ भन्दा बढी स्कुले विद्यार्थीलाई माओवादीले अपहरण गरी छापामारमा भर्ती गर्न लगेका छन् । अपहरित सबै १५ वर्षमुनिका र ५ देखि १० कक्षासम्म अध्ययनरत
छन् । उनीहरू सेमजोङ गाविसको चौतारा मावि, साङकोषको पशुपति मावि र साङकोष मावि, नलाङ गाविसको सिद्धेश्वर मावि र मिन्दुका मावि तथा छत्रेदेउराली गाविसको दशरथचन्द माविका विद्यार्थी हुन् ।
विद्यार्थी राजीखुसी भर्ती हुन आएको दाबी गर्दै माओवादीले उनीहरूलाई काभ्रेको कामीडाँडामा राखिएको जवाफ दिएको एक अभिभावकले बताए ।
माओवादीले स्कुले बालबालिका अपहरण गर्न थालेपछि घरपरिवारमा रुवाबासी चलेको छ । कतिपय अभिभावक छाराछोरी विद्यालय पठाउन डराइरहेका छन् भने पठाउनेले बालबालिकामाथि कडा निगरानी सुरु गरेका छन् ।
धादिङमा क्रियाशील मानव अधिकार तथा शान्ति समाज, पत्रकार महासंघ, मानव अधिकार संगठन, सिनेट नेपाल, छलफल चौतारीलगायत संघसंस्थाले विद्यार्थी अपहरणको कडा शब्दमा निन्दा गरेका छन् । उनीहरूले माओवादीद्वारा मानव अधिकार उल्लंघन भएको भन्दै यथार्थ जानकारी लिन स्थलगत अध्ययन गर्ने बताएका छन् ।
उदयपुरमा पनि माओवादीले सयभन्दा बढी बालबालिकालाई विद्यालयबाटै नियन्त्रणमा लिएका छन् । उनीहरूलाई छापामारमा भर्ती गराउने भन्दै सिन्धुली र खोटाङतर्फ लगेको प्रत्यक्षदर्शीले बताए । बेल्टार-९ माडीवासका १६ वषर्ीय बालकुमार कटुवाल र १७ वषर्ीय कृष्ण थापालाई शुक्रबार हरि कटुवालको नेतृत्वमा आएको माओवादी समूहले अपहरण गरेका थिए । मावि नेपालटारका हरी दाहाललगायत १२ भन्दा बढी विद्यार्थीलाई दुधौलीस्थित शिविरमा लगिएको गाउँलेले बताए । सदरमुकामस्थित असारी क्षेत्रबाट ९ जना, त्रिवेणीबाट १०, कटारीबाट १५, ताम्लिछालगायत गाविसबाट ४८ भन्दा बढी विद्यार्थीलाई लगेका छन् । अभिभावकले बालबालिकालाई फिर्ता गराइदिन जिल्लास्थित अधिकारकर्मी र सञ्चारकर्मीसमक्ष अपिल गरेका छन् । साथै माओवादीसमक्ष शीघ्र रिहाइको आग्रह गरेका छन् ।
जिल्लास्थित इन्सेक कार्यालयका अनुसार माओवादीले बसाहा, मुर्कुची, मौवासी, कटारीलगायत क्षेत्रमा जनमिलिसियाको पाँचदिने तालिम दिई छापामारमा भर्ना गर्न लगेका छन् । केही विद्यार्थी भने तालिम गर्न नसकी माओवादी कब्जाबाट भागेर घर फर्केका छन् । माओवादीका जिल्ला स्तरीय नेता यदुले भने छापामार भर्नाको कार्यक्रम नरहेको जिकिर गरे ।
यस्तै, संखुवासभामा एकै विद्यालयबाट १३ विद्यार्थीलाई नियन्त्रणमा लिई लगेका छन् । छापामारमा भर्ती गर्न भन्दै माओवादीले याफू गाविसस्थित महेश्वरी माविबाट कक्षा ५ देखि ९ सम्म अध्ययनरत १३ विद्यार्थीलाई जबर्जस्ती लगेका हुन् ।
लगिएकामा मदन राई, रुद्रबहादुर राई, पूर्ण राई, मानबहादुर राई, हस्तबहादुर विश्वकर्मा, भीमकुमार राई, दीपक राई, हर्कबहादुर राई, दीपराज राई, शुभराज राई, उत्तर राई, एकराज राई छन् भने एकको नाम खुलेको छैन ।
संखुवासभामा २ सय ५० बढीलाई छापामारमा भर्ती गरिएको जिल्लाको सुरक्षास्रोत र अधिकारकर्मीहरूको सञ्जालले जनाएको छ । जिल्लाको मानव अधिकार शान्ति तथा विकास प्रवर्द्धन समितिका संयोजक खड्ग राईले बाल सेना भर्ना रोक्न माग गरिएकोमा माओवादीबाट बेवास्ता भइरहेको भन्दै खेद व्यक्त गरेका
छन् । माओवादीले भने जबर्जस्ती नगरिएको र १८ वर्षमाथिकालाई मात्र भर्ना गरेको दाबी गर्दै आएको छ ।
उता दैलेखमा माओवादीले ठाँटीकाँध र लाकुरीमा भर्ती केन्द्र राखेका छन् । करिब ४ सय किशोरकिशोरीलाई छापामारमा भर्ती गरिएको छ । उद्योग वाणिज्य संघमा गत तीन वर्षदेखि मासिक १ हजार ज्यालादारीमा काम गर्ने नारायण नगरपालिका-६ भुर्तीका २० वषर्ीय धु्रव थापा स्वतः सरकारी सेनामा जान पाइने भन्दै सुर्खेत दशरथपुरमा स्थापना गरिएको माओवादीको छैटौं बि्रगेडमा सामेल भएका छन् । दुल्लु, नेपा, पादुका, बडलम्जी, गमौडीलगायत गाविसबाट ४८ विद्यार्थीलाई लगेका छन् । भर्ती अभियान शान्तिवार्ता आचारसंहिताविपरीत भन्दै जिल्लास्थित कांग्रेस र एमालेले विरोध जनाएका छन् ।
माओवादी जिल्ला जनसरकार प्रमुख नयाँराम थापाले विभिन्न पेसागत तथा भ्रातृ संगठनको खाली स्थान पूर्ति गर्नुपरेकाले छापामार नभई मिलिसिया भर्ती अभियान चलाइएको बताए ।
